ලොව පුරා වෙසෙන දෘශ්‍යාබාධිත පුද්ගලයන් මුහුණ දෙන ප්‍රධාන ගැටලුවක් වන්නේ ඔවුන් සදහා සකස් කරන ලද පොත් හිගයයි. බොහෝ අවස්ථා වලදී ඔවුනට තම අවශ්‍යතා සපුරා ගැනීමට සිදු වන්නේ දෘශ්‍යාබාධිත නොවන වෙනත් පුද්ගලයෙකු ලවා අවශ්‍ය පොත පත කියවාගැනීමෙනි. දෘශ්‍යාබාධිත පුද්ගලයන් සදහා නිශ්පාදනය කරනු ලබන බ්‍රේල් පොත් ඇති නමුත් එම පිටපතක් සදහා විශාල මුදලක් වැය වන අතර මෙම පිටපතක් පාවිච්චි කළ හැක්කේ එක් වරකට එක් අයෙකුට පමණි. මේ නිසා අධ්‍යයන කටයුතු වලදී මෙන්න සාමාන්‍යය එදිනෙදා ජීවිතයේ දී දෘශ්‍යාබාධිත පුද්ගලයන් ට මහත් අසීරැතා වලට ලක් වීමට සිදුවී තිබේ.
ඔවුනට අත් වැලක් වනු වස් ශ්‍රී ජයවර්ධනපුර විශ්ව විද්‍යාලයේ පාලි හා බෞද්ධ අධ්‍යයනාංයේ මහාචාර්ය මැදගොඩ අභයතිස්ස හිමියන් ගේ පූර්ණ මූල්‍ය දායකත්වයෙන් ” විනිවිද ” තේමාව යටතේ ශ්‍රව්‍ය පොත් (Audio Books) සකස් කිරීමේ සමාජ සත්කාර වැඩපිළිවෙලක් ආරම්භ කර ඇත.මෙම සත්කාරය ශ්‍රී ජයවර්ධනපුර විශ්ව විද්‍යාලයේ උපාධිධාරිනියන් වන සක්යා නිර්මාණි මෙනෙවිය සහ 07 දෙනෙතුගෙන් සමන්විත කාර්යමණ්ඩලයක් විසින් මෙහෙයවනු ලබන අතර මේ සදහා අවශ්‍ය තාක්ෂණික උපදේශකත්වය ඩේසි ලංකා පදනමේ උප සභාපතිවරයා වශයෙන් කටයුතු කරන කසුන් නයනජිත් මහතා විසින් ලබා දෙයි.
මෙම ශ්‍රව්‍ය පොත් (Audio Books) දැනට සකස් කෙරෙමින් පවතින්නේ දෘශ්‍යාබාධිත විශ්ව විද්‍යාල සිසුන් ගේ අවශ්‍යතාවන් සපුරා ගැනීමට අවශ්‍ය විෂයයන් හා සම්බන්ධ පොත් මූලික කර ගෙන වන අතර පසු කාලීනව ඕනෑම අයෙකුට භාවිතා කළ හැකි වන පරිදි පොදු පොත් සකස් කිරීමට අදහස් කරයි. දැනට මෙම ශ්‍රව්‍ය පොත් (Audio Books) විශ්ව විද්‍යාල කිහිපයක පුස්තකාල වලට ලබා දී ඇති අතර අවශ්‍යතාවය මත තැටි ගත කර ද ගෙන්වා ගැනීමට හැකියාව ලබා දීමට අදහස් කර තිබේ.මහාචාර්ය මැදගොඩ අභයතිස්ස හිමියන් ගේ අදහස් අනුව මසකට පිටු 3000ක ඉලක්කයක් සපුරා ගැනීමට අදහස් කරන අතර මෙම ශ්‍රව්‍ය පොත් (Audio Books) භාවිතා කරන්නන් හට තමාට අවශ්‍ය කරන පිටුවකට හෝ පරිච්ඡේදයකට පහසුවෙන් ළගා වීමට හැකා වීමේ පහසුකම සලසා දී ඇත.
