Prof. Muditha speaks to Rivira on his challenges and accomplishments

Prof Muditha

 

Speaking to Rivira, Prof. Muditha Vidanapathirana, Professor of Forensic Medicine and Head of department of Forensic Medicine at Jpura discussed his pursuit of happiness full of trials and tribunals, ups and downs and most of all passion and determination. He spoke of this journey he took through the mill from childhood with all its challenges and his accomplishments thus far.

Prof. Vidanapathirana is a dynamic character at Jpura who has produced many a significant research, journals and publications. He was appointed the Head of Department of Forensic Science in 2010 and has taken his department to greater heights throughout the years. He is indeed a role model to all determined spirits and he epitomizes the notion, “if there’s a will there’s a way”.

Access the article : http://www.rivira.lk/online/2016/06/04/%E0%B6%B4%E0%B6%B1%E0%B7%8A%E0%B6%AD%E0%B7%92%E0%B6%BA%E0%B7%9A-%E0%B6%AF%E0%B7%99%E0%B7%80%E0%B7%90%E0%B6%B1%E0%B7%92%E0%B6%BA%E0%B7%8F%E0%B7%80%E0%B7%93%E0%B6%B8-%E0%B6%AF%E0%B6%BB%E0%B7%8F%E0%B6%9C/

 

Category Posts

රිවිර පුවත් පතේ පලවූ මහාචාර්ය මුදිත විදානපතිරණගේ රුව ගුණ වරුණ

පන්තියේ දෙවැනියාවීම දරාගන්න බැරුව මම ක්‍රිකට් නැවැත්තුවා – ශ්‍රී ජයවර්ධනපුර විශ්ව විද්‍යාලයේ අධිකරණ වෛද්‍ය විද්‍යාව පිළිබඳ අධ්‍යයන අංශ මහාචාර්ය මුදිත විදානපතිරණ
Prof Muditha

දකුණේ ඉපිද කොළඹ ආනන්ද විද්‍යාලයෙන් පාසල් අධ්‍යාපනය නිමා කළ මුදිත විදානපතිරණ කොළඹ විශ්ව විද්‍යාලයේ වෛද්‍ය පීඨයෙන් වෛද්‍ය උපාධිය ලැබුවේ 94 වසරේය.

රාගම සහ ගාල්ල මහ රෝහල්වලින් සීමාවාසික පුහුණුව ලබා අනුරාධපුර මහ රෝහලට පළමු පත්වීම ලැබූ වෛද්‍ය මුදිත විදානපතිරණ මහතා 97 වසරේ කොළඹ අධිකරණ වෛද්‍ය නිලධාරි කාර්යාලයට අනුයුක්ත වී කොළඹ විශ්ව විද්‍යාලයේ පශ්චාත් උපාධි ආයතනයෙන් අධිකරණ වෛද්‍ය විද්‍යා ඩිප්ලෝමා පාඨමාලාව හැදෑරීය. 2001 නොවැම්බර් මාසයේ අධිකරණ වෛද්‍ය විශේෂඥ උපාධිය (ර්ච්) සම්පූර්ණ කළ වෛද්‍ය විදානපතිරණ මහතා කොළඹ අධිකරණ වෛද්‍ය නිලධාරී කාර්යාලයේ සහකාර අධිකරණ වෛද්‍ය නිලධාරිවරයෙකු ලෙස කටයුතු කර ‍‍‍ජ්‍යෙෂ්ඨ කථිකාචාර්යවරයකු ලෙස 2002 වසරේ ගාල්ල කරාපිටිය වෛද්‍ය පීඨයේ අධිකරණ වෛද්‍ය විද්‍යා දෙපාර්තමේන්තුවට සම්බන්ධ විය. ඒ අවධියේ ග්ලාස්ගෝ විශ්ව විද්‍යාලයෙන් අධිකරණ වෛද්‍ය විද්‍යාව පිළිබඳ පශ්චාත් උපාධිය ලද වෛද්‍ය මුදිත විදානපතිරණ මහතා 2004 වසරේ කරාපිටිය වෛද්‍ය පීඨයේ අධිකරණ වෛද්‍ය විද්‍යා දෙපාර්තමේන්තු ප්‍රධානියා ලෙස පත්විය. ඒ අවදියේ දෙපාර්තමේන්තුවට විශාල වැඩ කොටසක් කළ වෛද්‍ය විදානපතිරණ මහතා 2008 වසරේ අපරාධ විද්‍යාව පිළිබඳ ශාස්ත්‍රපති (ර්ඒ) උපාධිය ද ලැබුවේය.

2010 වසරේ ජයවර්ධනපුර විශ්ව විද්‍යාලයට ‍‍‍ජ්‍යෙෂ්ඨ කථිකාචාර්යවරයකු ලෙස පත්වූ ඔහු ඉගැන්වීම් කටයුතු මෙන්ම පර්යේෂණ කටයුතු ද රැසක් ආරම්භ කළේය. ගත් කතුවරයකු ලෙස කෘතීන් හතරක් ලියා පළ කර ඇති වෛද්‍ය මුදිත විදානපතිරණ මහතා 2016 අප්‍රේල් මස අධිකරණ වෛද්‍ය විද්‍යාව පිළිබඳ අධ්‍යයන අංශයේ මහාචාර්ය පදවිය ලැබිය.

මෙවර රුව ගුණ වරුණේ ලියැවෙන්නේ ශ්‍රී ජයවර්ධනපුර විශ්ව විද්‍යාලයේ අධිකරණ වෛද්‍ය විද්‍යා දෙපාර්තමේන්තු අධ්‍යයන අංශයේ අධිකරණ වෛද්‍ය විද්‍යාව පිළිබඳ අධ්‍යයන අංශ මහාචාර්ය මුදිත විදානපතිරණ මහතාගේ ජීවන තොරතුරු වේ.

* උප්පැන්න සහතිකයෙන් ඔබට ලැබුණු නම?

මුදිත විදානපතිරණ.

* උපන්න ගම් පළාත?

බෙලිඅත්තේ වහරක්ගොඩ.

* උපන් දිනය කවදද?

1966 පෙබරවාරි 06.

* පවු‍ලේ කී වැනියා විදියට ද උපන්නේ?

හතරවැනියා. මට අක්කා කෙනෙක් සහ අයියලා දෙන්නෙක් ඉන්නවා.

* අම්මා තාත්තා කවුද කියමුද?

අම්මා සෝමාවතී මුණසිංහ. තාත්තා ගුණපාල විදානපතිරණ.

* ඒ කා‍ලේ ඔවුන්ගේ වෘත්තිය වුණේ?

අපේ තාත්තා ආයුර්වේද වෛද්‍යවරයෙක්. අම්මා ගුරුවරියක්. ඇය විශ්‍රාම ගත්තේ කොළඹ ලුම්බිණි මහා විද්‍යාලයෙන්. අද තාත්තා ජීවතුන් අතර නෑ.

* කොහොමද ළමා කාලෙ?

මම අවුරුදු දෙකෙන් කොළඹ ආවා. අපේ අයියා ශිෂ්‍යත්වෙ පාස් වෙලා කොළඹ ආනන්ද විදුහලට එනකොට අපේ අම්මා තාත්තව එහෙ ඉතුරු කරලා මාරුවක් අරන් අපි හතර දෙනාම එකතු කරගෙන කොළඹ ආවා.

* ඒ ඇවිත්?

නුගේගොඩ ගෙදරක හිටියේ. නිවාඩු කාලයක් ආව ගමන් බෙලිඅත්තෙ යනවා. උදේ පටන් හවස් වෙනකම් විජේසිංහ, සුනිල්, චූටිරන්, සම්පත්, පතිරණ වගේ යාළුවෝ එක්ක සෙල්ලම් කළා.

* ඔබ පාසල් යන්නේ?

කොළඹ අශෝක කනිෂ්ඨ විද්‍යාලයට, කොළඹ ආනන්ද විද්‍යාලයට.

* කොහොමද මේ කා‍ලේ?

ඒ කා‍ලේ අශෝක විද්‍යා‍ලේ විදුහල්පති ධර්මරත්න සර්. මගේ ඉස්කෝලෙ යන්න තිබ්බ හොර ගතිය නැති කළෙත් ධර්මරත්න සර්මයි.

* ඒ කොහොමද?

මම හැමදාම උදේට නැගිටලා අම්මට කියනවා කළු බැලුමක් හොයලා දුන්නොත් විතරයි ඉස්කෝලෙ යන්නේ කියලා. අම්මා මාවත් ඇදගෙන උදේට නුගේගොඩ කඩ ගානේ යනවා කළු බැලුම් හොයන්න.

* පුළුවන් වුණාද ඉතින් හොයාගන්න?

හොයාගන්න බැරිවුණ හින්දා මගේ කරදරේ අම්මා ධර්මරත්න සර්ට කිව්වා. ඒ වෙලාවේ සර් අත දිගහැරලා මගේ පස්සට එකක් ගැහුවා. මීට පස්සේ එහෙම කිව්වොත් වේවැලෙන් ගහන්නෙ කියලා.

* එදායින් පස්සේ දඟවැඩ අතෑරියා?

දඟවැඩ කළා පහේ පන්තියට යනකල්. දඬුවමුත් ලැබුවා. ඒ අතරේ තමයි ශිෂ්‍යත්වෙ පාස්වෙලා ආනන්ද විද්‍යාලෙට ගියේ.

* ඊට පස්සේ හොඳ ළමයෙක් වුණාද?

ආනන්දෙ සිංහල උගන්නපු තිලකරත්න සර්ගෙන් ගුටිකෑවා. ඒ කා‍ලේ විදුහල්පති කුඩලිගම සර්ගෙන් බැණුම් අහලා තියෙනවා.

* ඉගෙනගන්න දක්ෂද?

ඇත්තටම ඉගෙනගන්න දක්ෂයි. මම හැමදාම පන්තියේ පළමුවැනියා. 9 පන්තියේ දී එක වාරයක් පන්තියේ දෙවැනියා වුණා. ඒ අතරේ මම ආනන්දයේ ක්‍රිකට් සෙල්ලම් කළා.

* ඊට පස්සේ?

ක්‍රිකට් භාර ආචාර්ය ලයනල් මෙන්ඩිස් මහතාට මම කිව්වා ක්‍රිකට් නවත්තනවා කියලා.

* ඔබ එතකොට ක්‍රිකට් කණ්ඩායමේ හිටියද?

මම මුලින්ම 13න් පහළ ක්‍රිකට් කණ්ඩායමට සම්බන්ධ වුණේ. ක්‍රිකට් ක්‍රීඩාවට හොඳටම දක්ෂයි. මම ඒ කා‍ලේ හොඳ පිතිකරුවෙක්. 15න් පහළ කණ්ඩායමට ප්‍රැක්ටිස් යද්දී පන්තියේ දෙවැනියා වීම දරාගන්න බැරුව මම ක්‍රිකට් නැවැත්තුවා.

* දිගටම ක්‍රිකට් නවතා දැමුවා?

දිගටම ක්‍රිකට් නැවැත්තුවා. ළමයි අතරේ සැහැල්ලු පන්දු විතරයි සෙල්ලම් කළේ. නමුත් මම දිගටම පන්තියේ පළමුවැනියා වුණා.

* තවත් බාහිර වැඩවල යෙදුණද?

මම කථික සංගමයේ සභාපති, කනිෂ්ඨ විවාද කණ්ඩායමේ නායකයා, විද්‍යා ශිෂ්‍ය සංගමයේ සභාපති, ‍‍‍ජ්‍යෙෂ්ඨ විවාද කණ්ඩායමේ සභාපති සහ නායකයා, සිංහල සාහිත්‍ය සංගමයේ සභාපති, කනිෂ්ඨ හා ‍‍‍ජ්‍යෙෂ්ඨ ශිෂ්‍ය නායකයෙකු ලෙසත් කටයුතු කළා.

* කථිකත්වයේ දක්ෂයෙක්ද?

මගේ නායකත්වයෙන් පැවැති එක විවාද තරගයක්වත් පැරදුණේ නෑ. විවාද කණ්ඩායමේ අනුශාසකවරුන් වූ නන්දනී රණතුංග ගුරුතුමියගෙනුත් සමරවික්‍රම සර්ගෙනුත් ඊට ලොකු සහායක් ලැබුණා.

* විශාල වූ බාහිර වැඩ කොටසකනේ නියැළී තියෙන්නේ?

මම චිත්‍රවලට දක්ෂ නිසා චිත්‍ර තරගවලට ඉදිරිපත් වුණා. වේදිකා නාට්‍ය කළා. කොඩිකාර ගුරුතුමාගෙන් චිත්‍ර ඉගෙන ගනිද්දී ශංකර් ජාත්‍යන්තර චිත්‍ර තරගයේ පිට පිටම ලෝකඩ පදක්කම් 3ක්, කනගාවා ජපන් චිත්‍ර තරගයෙන් රිදී පදක්කමක් ඇතුළුව ලංකාවේ චිත්‍ර තරග රැසකින් ජය ලැබුවා.

* එතකොට වේදිකා නාට්‍යත් පාසලින් එහා ගියාද?

පාසල් හා දහම් පාසල් වේදිකාවේ මගේ රඟපෑම් දැකලා රා.මු.මු. බණ්ඩාර කියන නාට්‍ය අධ්‍යක්ෂවරයා මාව ‘තක්කඩි’ නාට්‍යයට ගත්තා. ඒක ප්‍රසිද්ධ වේදිකාවේ 25 වතාවක් පෙන්නුවා.

* මේ වෙනකොට ඉගෙනීමේ අරමුණක් තිබුණද?

8 පන්තියේ දී තක්කඩි නාට්‍යය වෙනුවෙන් මං ගැන පත්තරේ ලිපියක් පළ වුණා. ඒකෙදි මං කියලා තිබුණා හොඳට පාඩම් කරලා කවදාහරි වෛද්‍යවරයෙක් වෙනවා කියලා.

* ඔබේ අරමුණ වුණේ ඒකයි?

වෛද්‍යවරයෙක් වෙන අරමුණ මගේ හිතේ තියෙන්න ඇති. මම උසස් පෙළට තෝරගත්තේ ජීව විද්‍යාව.

* ඉතින් ඊට පස්සේ?

උසස් පෙළ පන්තියට ගිහින් පළමුවැනි අවුරුද්දේ පන්තියේ 35 වැනියා වුණා. ඒ ප්‍රධාන වශයෙන් බාහිර වැඩ කරපු හින්දා. ඒ වෙලාවේ උසස් පෙළ පන්තියේ ඉවෝන් විජේසිංහ, සේනානි විජේරත්න, සුසිලා සමරවීර හා මහින්දසිරි ප්‍රනාන්දු ගුරුවරුන් අපේ අම්මව ගෙන්නුවා.

* ඒකෙ ප්‍රතිඵලය වුණේ?

ගුරුවරු වගේම අම්මත් මට අවවාද කළා. මම බාහිර වැඩ කරන ගමන් මහන්සි වෙලා පාඩම් කළා. 1985 දී උසස් පෙළ විභාගෙන් ලංකාවෙන්ම 13 වැනියා විදියට පාස් වුණා. වසරේ දක්ෂතම ශිෂ්‍යයාට හිමි තෝමස් අමරසූරිය කුසලානය 85 දී මම ලැබුවා.

* ඊට පස්සේ?

මම උසස් පෙළ විභාගයට ආගෝස්තු මාසේ ලියලා සැප්තැම්බර් මාසෙම බෙලිඅත්තේ ගියා. ගිහින් බෙලිඅත්තෙ, තංගල්ලෙ, වලස්මුල්ලෙ සත්ත්ව විද්‍යා පන්ති පටන් ගත්තා.

* එහෙම පන්ති කරද්දි?

ඒ අතරේ තමයි ප්‍රතිඵල ආවේ. 86 දී මම කොළඹ විශ්ව විද්‍යා‍ලේ වෛද්‍ය පීඨයට තේරුණා. ඊට පස්සේ පන්ති කළේ සෙනසුරාදා, ඉරිදා.

* කොහොමද විශ්ව විද්‍යාල කා‍ලේ?

අපි විශ්ව විද්‍යාලයට යනකොට තිබුණේ ඒතරම් හොඳ වාතාවරණයක් නෙවේ. රටේ තිබුණ දේශපාලන තත්ත්ව විශ්ව විද්‍යාල ඇතුළෙත් තිබුණා.

* එහෙම වුණාම?

මාස හතරකට පස්සේ විශ්ව විද්‍යාල වැහුවා. මම ගමට වෙලා ටියුෂන් පන්ති කළා. මාසෙකට පස්සේ ආයෙත් විශ්ව විද්‍යාල පටන් ගත්තා. මම ඒ වතාවේ පන්ති ටික යාළුවෙකුට භාර දුන්නා. එදා මගේ පන්ති ආව 6 දෙනෙක් අද වෛද්‍යවරු.

* ඊට පස්සේ?

විශ්ව විද්‍යාල පටන් ගත්තත් ආයෙත් දින නියමයක් නැතුව වැහුවා. ඔය අතරේ 87 නොවැම්බර් භීෂණ කා‍ලේ දේශප්‍රේමීන් මගේ තාත්තව ඝාතනය කළා.

* ඔබේ පියා ඝාතනය කරන්න වැරැද්ද?

මගේ තාත්තා රෙද්ද බැනියම අඳින සුරාව සූදුව නැති පුදුම විදියේ හොඳ වෙද මහත්තයෙක්. ඔවුන් තාත්තගෙන් රුපියල් 5000ක් ඉල්ලලා තියෙනවා. මගේ ළමයි තවම ඉගෙන ගන්නවා කියලා. තාත්තා දීලා නෑ. ඒ නිසා මහ රෑ ගෙදරට ඇවිත් පිහියෙන් ඇනලා ගිහින් තිබුණා.

* හරිම දුක්බර මතකයක්නේ?

තාත්තගේ මරණෙන් පස්සේ මං ආයේ කොළඹ ආවා. යාළුවෙකුගේ අයියා කෙනෙකුගේ ‘ජැක්‍පොට්’ එකක වැඩ කළා සුපර්වයිසර් කෙනෙක් හැටියට. ඒ කා‍ලේ අපිට සල්ලි තිබුණෙ නෑ. අම්මගේ පැන්ෂන් වැටුප රුපියල් 3000යි. අයියා විතරයි රස්සාවක් කළේ.

* ඔබට ලැබුණ වැටුප කීයද?

රුපියල් 1500යි. මෝටර් බයිසිකලයක් ලැබුණා. මේ රස්සාව කරන ගමන් විශ්ව විද්‍යාල අරින්නෙත් නැති හින්දා නීතිය හදාරන්න හිතුවා. 1988 දී මම නීති විද්‍යාලයට බැඳුණා.

* ඉතින් ඔහොම කාලය ගවෛද්දී?

මාස තුනක් විතර යද්දී රස්සාවට යන එක නවත්තලාම ඉගෙන ගත්තා.

* විශ්ව විද්‍යාලවල වගේ නීති විද්‍යාලෙ ප්‍රශ්න තිබුණෙ නෑ?

නීති විද්‍යාලය පෞද්ගලික ආයතනයක්නේ. ඒක සාමකාමීව තිබුණා. නීති විද්‍යාලෙත් පළමුවැනි විභාගෙ ලිව්වම 89 දී ආයෙත් විශ්ව විද්‍යාල පටන් ගත්තා. ඒ නිසා ඒක නැවතුණා.

* කොහොමද ඉතින් විශ්ව විද්‍යාල කාලෙ?

ගොඩක් මහන්සි වෙලා අධ්‍යාපන කටයුතු කළා. ඒ අතරේ රගර් කණ්ඩායමට හා ක්‍රිකට් කණ්ඩායමට සම්බන්ධ වුණා. විවාද කණ්ඩායමේ නායකත්වයත් දැරුවා.

* ඔබ ක්‍රිකට්වලට නම් එදා ඉඳලා ආසයිනේ?

ක්‍රිකට් කණ්ඩායමේ අවුරුදු පහම සෙල්ලම් කළා. අවුරුදු තුනක් හොඳම පන්දු රකින්නා කුසලානය දිනුවේ මමයි. ඒ අතරේ 1994 දී වෛද්‍ය උපාධිය ලැබුවා. රාගම මහ රෝහ‍ලේත්, ගාල්ල කරාපිටිය මහ රෝහ‍ලේත් සීමාවාසික පුහුණුව ලැබුවා ශල්‍යකර්ම හා ළමා රෝග පිළිබඳව.

* කොහොමද ඒ කා‍ලේ?

ශල්‍ය වෛද්‍ය විශේෂඥ සී.ඩබ්ලිව්. වීරසූරිය මහතා යටතේ වැඩ කළා. ළමා රෝග පිළිබඳ විශේෂඥ වෛද්‍ය, මහාචාර්ය හරේන්ද්‍ර සිල්වා මහතා යටතේ ළමා රෝග පිළිබඳ පුහුණුව ලැබුවා.

* සීමාවාසික පුහුණුවෙන් පස්සේ?

අනුරාධපුර මහ රෝහලට පළමු පත්වීම ලැබුණා. මට තිබුණේ දැඩි සත්කාර ඒකකයක වැඩ කරන ආසාව. මම විවාහ වුණේ මේ කා‍ලේ. ඒ 1996 සැප්තැම්බර්.

* ඇය කවුද?

වෛද්‍ය ඉඳුනිල් රාමනායක. එයා මට හම්බ වුණේ 88 නීති විද්‍යාලෙදි. වෛද්‍ය උපාධිය හදාරන ගමන් එයත් නීතිය හැදෑරුවා. අද ඇය ශ්‍රී ජයවර්ධනපුර මහ රෝහ‍ලේ හදිසි අනතුරු ඒකකයේ වෛද්‍ය නිලධාරිනිය ලෙස කටයුතු කරනවා.

* ඉතින් ඊට පස්සේ?

ටිකක් කල් ඉන්නවා කියලා හිතාගෙන ගියේ. නමුත් ගිහින් අවුරුද්දකින් විතර අධිකරණ වෛද්‍ය විද්‍යාව පිළිබඳ ඩිප්ලෝමා පාඨමාලාවට තේරුණා.

* ඔබ ඒ වගේ පාඨමාලාවක් හදාරන්න හිතුවේ?

තාත්තගේ මරණෙන් පස්සේ මම හිතාගත්තා කවදා හරි අධිකරණ වෛද්‍ය විද්‍යා පිළිබඳ විශේෂඥයෙක් වෙනවා කියලා.

* ඒ විශේෂ හේතුවක් නිසාද?

තාත්තගේ මරණෙ මිනීමැරුමක් වෙලත් කැපුවෙ මැස්සක. එක සැකකරුවෙක්වත් අත්අඩංගුවට ගත්තෙ නෑ. මේ නිසා හිතුණා මේවට සක්‍රියව සහභාගි වෙන්න මං තෝරගන්න ඕන මේ ක්‍ෂේත්‍රය කියලා.

* ඉතින් අනුරාධපුරෙන් කොහාටද එන්නේ?

කොළඹ අධිකරණ වෛද්‍ය නිලධාරී කාර්යාලයට අනුයුක්ත වුණා. ඒ 1997 ඔක්තෝබර් මාසේ.

* කොහොමද මේ කා‍ලේ?

මම කොළඹ ප්‍රධාන අධිකරණ වෛද්‍ය විශේෂඥ එල්.බි.එල්. ද අල්විස් මහතා යටතට ගියේ. කොළඹ විශ්ව විද්‍යා‍ලේ පශ්චාත් වෛද්‍ය උපාධි අධ්‍යයන ආයතනයෙන් ඉගෙනීම් කටයුතු කරගෙන ගියා. මේ කා‍ලේ මම ලංකාවේ ආන්දෝලනාත්මක මිනීමැරුමක අධිකරණ වෛද්‍ය වාර්තාව දුන්නා.

* ඒ මොකද්ද?

රීටා ජෝන් මනෝහරන් ඝාතනය. ඇය ඉන්දියාවේ රූප සුන්දරියක්. සැමියා සමග මධුසමයට ලංකාවට ආ වේලාවේ තමයි මේ ඝාතනය සිදුවුණේ. රීටා ජෝන් ඝාතනයේ සැකකරුවන් 4 දෙනාම පරීක්ෂා කළේ මමයි. ඒ සැකකරුවන් 4 දෙනාගෙන් තුන් දෙනෙක් එල්ලුම් ගහට නියම වුණා.

* ඉතින් ඔහොම කාලය ගවෛද්දී?

අවුරුද්දකින් ඩිප්ලෝමාවේ පළමු කොටසේ විභාගය පාස් වුණා. ඒ කණ්ඩායමේ පළමුවැනියා වෙලා.

* ඊට පස්සේ?

MD උපාධිය හැදෑරුවා. කොළඹ දකුණ මහ රෝහ‍ලේ අධිකරණ විශේෂඥ වෛද්‍ය එස්.ඒ.එම්. කොළඹගේ මහතා යටතේ අවුරුද්දක් පුහුණු වුණා.

* ඒ අවුරුද්ද ගෙවුණාම?

2001 දී අධිකරණ වෛද්‍ය විද්‍යාව පිළිබඳ අධ්‍යයනාංශයේ මහාචාර්ය රවීන්ද්‍ර ප්‍රනාන්දු මහතා යටතේ MD උපාධියේ දෙවැනි අවුරුද්ද පුහුණු වෙලා 2001 නොවැම්බර් මාසේ ර්ච් උපාධිය සම්පූර්ණ කළා.

* ඔබ අධිකරණ වෛද්‍ය විද්‍යා විශේෂඥතාව ලැබුවට පස්සේ?

ටික කාලයක් කොළඹ අධිකරණ වෛද්‍ය නිලධාරී කාර්යාලයේ සහකාර අධිකරණ වෛද්‍ය නිලධාරියෙකු හැටියට වැඩ කළා.

* කොහොමද ඒ වැඩකරපු කා‍ලේ?

ඒ කා‍ලේ එහි ප්‍රධානියා අධිකරණ වෛද්‍ය විශේෂඥ එල්.බි.එල්. ද අල්විස් මහතා. දකුණු ආසියාවේ දැනට ළමා අපයෝජන වැරදිකරුවකුට ලබා දී ඇති වැඩිම දඬුවම් කාලයේ අධිකරණ වෛද්‍ය වාර්තාව ලබා දුන්නේ මමයි.

* ඔය කියන සිද්ධිය?

‘සින්නතම්බි’ සිදුවීමේ වැරදිකරුට වසර 35ක දඬුවම් කාලයක් දුන්නා. එහි දී කොළඹ විශ්ව විද්‍යාලයේ මනෝ විද්‍යාව පිළිබඳ මහාචාර්ය ප්‍රියංගනී ද සොයිසා මහත්මියත් අප සමග කටයුතු කළා.

* ඔය ටික කාලය ගෙවුණාම?

2002 දී ගාල්ල කරාපිටිය වෛද්‍ය පීඨයේ අධිකරණ වෛද්‍ය දෙපාර්තමේන්තුවට සම්බන්ධ වුණා ‍‍‍ජ්‍යෙෂ්ඨ කථිකාචාර්යවරයෙකු විදියට. එවකට එහි ප්‍රධානියා අධිකරණ වෛද්‍ය විද්‍යාව පිළිබඳ අධ්‍යයනාංශ මහාචාර්ය චන්ද්‍රසිරි නිරිඇල්ල මහතා.

* ඉතින් ඔය ගිහින්?

ගාල්ලේ ඉන්නවා සැප්තැම්බර් වෙනකල්. ස්කොට්ලන්තෙ ග්ලාස්ගෝ විශ්ව විද්‍යාලයෙන් අධිකරණ වෛද්‍ය විද්‍යාව පිළිබඳ පශ්චාත් උපාධියක් හදාරන්න ගියේ ඉන් පස්සෙයි.

* ඒ කොයි තරම් කාලෙකටද?

අවුරුද්දයි. අධිකරණ වෛද්‍ය විද්‍යාව පිළිබඳ මහාචාර්ය පීටර් වැනෙයිස් මහතාගෙන් පුහුණුව ලැබුවේ. ග්ලාස්ගෝ විශ්ව විද්‍යාලෙදි මං හිස් කබල මත මුහුණ ප්‍රතිනිර්මාණය කිරීම පිළිබඳ විශේෂ අධ්‍යයනයක් සිදු කළා. 2003 දී මං ලංකාවට ආවා.

* ලංකාවට ඇවිත්?

ආයෙත් කරාපිටියේ අධිකරණ වෛද්‍ය විද්‍යා දෙපාර්තමේන්තුවට ගියා. 2004 දී මම එහි ප්‍රධානියා වුණා.

* කොහොමද ඉතින් මේ කා‍ලේ?

අවුරුදු හයක් දෙපාර්තමේන්තුවේ ප්‍රධානියා විදියට හිටියා. මේ කා‍ලේ අපි බොහොම හොඳට වැඩ කළා. ඒ අතරේ 2008 දී අපරාධ විද්‍යාව පිළිබඳ ර්ඒ උපාධියත් කළා.

* මොනවද ඉතින් ඔය හොඳට කරපු වැඩ?

සුනාමි අවස්ථාවේ සේවය කළා. මිනී ගොඩගැනීම් ගොඩක් කළා. මිනීමැරුම්වලට ගොඩක් වාර්තා දීලා තියෙනවා වගේම සාක්කිත් දීලා තියෙනවා.

* සුනාමියෙන් මියගිය සිරුරු ඒ තරම් ගොඩගත්තේ?

සුනාමියට මියගිය අයගෙ සිරුරු ගඳ ගහනවට වළ දැම්මනේ. පසුව මහ විශාල ප්‍රමාණයක් ගොඩගත්තා හඳුනාගැනීම්වලට, නෑදෑයන්ගේ ඉල්ලීම්, මහෙස්ත්‍රාත් නියෝග අනුව.

* ඔය කාලෙ වෙන මොනවද කළේ?

කරාපිටිය වෛද්‍ය පීඨයේ පීඨාධිපති මහාචාර්ය ආරියනන්ද මහතා හා එක්ව කමිටුවකින් කරාපිටිය වෛද්‍ය පීඨයේ වෛද්‍ය ප්‍රදර්ශන මධ්‍යස්ථානය හැදුවා. මම මේ කමිටුවේ ‍ලේකම්.

* මොකක්ද ඔය ප්‍රදර්ශන මධ්‍යස්ථානය?

මිනිස් සිරුරේ කොටස් 500ක් විතර විච්ජේදනය කරලා සංරක්ෂණය කරලා ප්‍රදර්ශනයට තියලා තියෙනවා. පාසල් සිසු සිසුවියෝ බලන්න එනවා.

* එපමණක්ද?

ඔය කා‍ලේ මම රුහුණු සේවයත් එක්ක වෛද්‍ය ගැටලු වැඩසටහන් 200ක් විතර කළා අවුරුදු 5ක් පුරා සතියකට වරක්.

* ගාල්ලෙදි ඔබ ගොඩක් වැඩ කරලා?

ළමා රෝග අංශයේ මහාචාර්ය සුජීව අමරසේන මහතා සමග එකතු වෙලා දෙපාර්තමේන්තුවට වීඩියෝ රෙකෝඩින් සෙන්ටර් එකක් ඇති කළා. අපයෝජනයවට ලක් වූ ළමයින්ගේ ඉතිහාසය වීඩියෝගත කරන්න.

* ඔය විදියට වැඩ කරලා?

2010 දී ජයවර්ධනපුර විශ්ව විද්‍යාලයේ අධිකරණ වෛද්‍ය දෙපාර්තමේන්තුවට ආවා ‍‍‍ජ්‍යෙෂ්ඨ කථිකාචාර්යවරයෙකු විදියට.

* ඉතින් මේ කාලෙ කොහොමද?

ඉගැන්වීම් කටයුතු කරන අතරේ ගොඩක් පර්යේෂණ කරනවා. සමහර ඒවා දැවැන්ත ව්‍යාපෘති.

* මොනවද ඔය පර්යේෂණ?

හිස් කබල්වලින් නැවත රූපය ප්‍රතිනිර්මාණය කිරීම. කොළඹ විශ්ව විද්‍යාලයේ පරිගණක අංශයත් එක්ක එකතු වෙලා මේ පර්යේෂණය අවුරුදු 5ක් තිස්සේ කරනවා.

* පර්යේෂණය සාර්ථකයි?

තව අවුරුදු දෙකකින් අවසානයි. අපේ බලා‍පොරොත්තුව ගොඩනගන්න සියලුම නාඳුනන හිස්කබල් හඳුනාගන්නට හැකි හඳුනාගැනීමේ මධ්‍යස්ථානයක් ඇති කිරීම. මේ වෙනකොටත් මේ ප්‍රදර්ශනය වෙනුවෙන් ජාත්‍යන්තර හා ජාතික සම්මාන 10කට වැඩිය දිනලා තියෙනවා.

* තවත් පර්යේෂණ තියෙනවා?

කොටකෙතන ඝාතන 16යේ පරීක්ෂණ වාර්තා කළ වෛද්‍යවරු 8 දෙනා සමග එකතුවෙලා පර්යේෂණයක් කළා. ඊට ජීන්ටෙක් ආයතනය ජාන පිළිබඳ විශේෂඥ ආචාර්ය රුවන් ඉ‍ලේපෙරුම මහතාත් සහභාගි වුණා.

* මොකද්ද ඉතින් ඒ පර්යේෂණයේ අවසානය?

තවම අවසාන නෑ. නමුත් දැනට අපි සොයාගත්තා ඒ ඝාතන වැ‍ලේ තුන් වර්ගයක මිනීමරුවන් සිටින බව. ඒ දම්වැල් මිනීමරුවන් කොපිකර කරන මිනීමරුවන් තමන් එතැන සිටියේ නෑ කියලා ඔප්පු කරන්න උත්සාහ කරන මිනීමරුවන් ගැන.

* ඔබ මෑත කාලයේ කළ පර්යේෂණ එපමණයි?

පදික වේදිකාවේ යාචකයන් මැරූ සිද්ධියත්, ග්‍රීස් යකා පිළිබඳවත් පර්යේෂණ කළා.

* යාචකයන්ගේ සිද්ධියේ මොකද වුණේ?

පදික වේදිකාවේ යාචකයන් 14 දෙනෙකු එකදිගට මරාදමා තිබූ අවස්ථාවේ ඒ ඝාතන වැල සිදු කළ පුද්ගලයා හඳුනාගත්තා. ඒ යාචකයන් අතරම සිටි යාචකයෙක්.

* එතකොට ග්‍රීස් යකා?

ග්‍රීස් යකා පහරදීම් කළ අවස්ථා කීපයක් මමත් වෛද්‍ය ටිකිරි ගුණතිලක මහතාත් කළ පර්යේෂණයෙන් අවස්ථා හතරක්ම අපට හමු වුණේ තමන් විසින්ම සිදුකරගත් තුවාල සහ පහරදී ගැනීම්.

* ඉතින් ඔය විදියට ගෙවුණු කාලයේ දී?

2011 මම එංගලන්තයේ රාජකීය වෛද්‍ය විද්‍යාලයේ අධිකරණ වෛද්‍ය විද්‍යා පීඨයෙන් MFFLM ඩිප්ලෝමාව ලබාගෙන එහි සාමාජිකත්වය ලබා ගත්තා.

* ඊට පස්සේ?

ඔය අතරේ මං ‍පොත් හතරක් ලිව්වා. 2007 දී ලොව සසල කළ චරිත, 2008 දී අධිකරණ මානව විද්‍යාව, 2014 ළමා අපයෝජනය සහ 2015 දී ඉංග්‍රීසි බසින් ‍පොතක් ලිව්වා ‘Students guide to forensic skeletal analysis’ නමින්.

* ඔබ ‍පොත් පමණද ලිව්වේ?

වෛද්‍ය පර්යේෂණ සඟරාවලට ලිපි 190කට වැඩි ප්‍රමාණයක් ලියලා තියෙනවා. සිංහල සහ ඉංග්‍රීසි පුවත්පත්වලටත් ලිපි 40කට වැඩිය ලියලා තියෙනවා.

* ඔබ නිලතල තනතුරුත් දරලා ඇති?

2014 දී මම ශ්‍රී ලංකා අධිකරණ වෛද්‍යවරුන්ගේ සංගමයේ 11 වැනි සභාපති වුණා. ඒ කා‍ලේ අධිකරණ වෛද්‍යවරුන්ගේ සංගමයට මම ක්‍රිකට් කණ්ඩායමක් හැදුවා. 2015 එහි මම නායකයාත් වුණා.

* ඉතින් ඔය විදියට ඔබේ කාලය ගෙවී යද්දී?

2016 අප්‍රේල් 15 වැනි දා මට අධ්‍යයන අංශ මහාචාර්ය පදවිය ලැබුණා. මේ ජයවර්ධනපුර විශ්ව විද්‍යාලයේ අධිකරණ වෛද්‍ය විද්‍යා දෙපාර්තමේන්තුවට පත්වුණ පළමුවැනි මහාචාර්යවරයා මමයි. ඒත් එක්කම කියන්න ඕන මේ විශ්ව විද්‍යාලය ගැන. අද මෙතන පුදුම සාමූහිකත්වයක් තියෙන්නේ. ඒ වගේම අපිව උපකුලපති මහාචාර්ය සම්පත් අමරතුංග සහ පීඨාධිපති මහාචාර්ය සුරංගි මහතා යසවර්ධන මහත්මියත් උනන්දු කරනවා.

* ඔබේ අධීක්ෂණයෙන් පුහුණුව ලබපු හුඟක් අය ඇති?

එවැනි බොහෝ පිරිසක් ඉන්නවා. ඒ අතරේ වෛද්‍ය දහනායක, වෛද්‍ය ශ්‍රියන්ත අමරරත්න, වෛද්‍ය රුවන් නානායක්කාර, වෛද්‍ය සඳකැන් වඩුගේ, වෛද්‍ය පී.ආර්. ජයසූරිය වැනි විශේෂඥ වෛද්‍යවරුත් ඉන්නවා.

* දූ දරුවන්ගේ තොරතුරු කොහොමද?

දුවලා දෙන්නෙක් ඉන්නවා. ලොකු දුව සෙනාරා විදානපතිරණ. දේවි බාලිකා විදුහ‍ලේ උසස් පෙළ හදාරනවා. ‍පොඩි දුව දිවාරා විදානපතිරණ ඒ පාස‍ලේම 9 පන්තියේ ඉගෙන ගන්නවා.

* මේ වෙනකොට කොයිතරම් අධිකරණ වෛද්‍ය වාර්තා නිකුත් කර තියෙනවාද?

මම මරණ 1500ක විතර වාර්තා දීලා තියෙනවා. 5000ක් විතර රෝගීන් පරීක්ෂා කර වාර්තා දීලා තියෙනවා.

* මේ වෘත්තිය තෝරා ගැනීම ගැන මොකද හිතෙන්නේ?

සතුටුයි. මේ වෛද්‍ය වෘත්තියේ ඉහළම කොටසක්. මැරෙන හැම කෙනෙක්ම මැරෙන විදිහ ඉතුරු කරලයි යන්නේ. අපි ඒක කියවන්න අහන්න දැනගන්න ඕන. සිරුරු පරීක්ෂාවෙන් සහ වටපිටාව පරීක්ෂාවෙන් නැවත අපට සිද්ධිය ප්‍රතිනිර්මාණය කරන්න පුළුවන්.

* ඔබේ ජීවිතේ ආදර්ශය කරගත් කෙනෙක් හිටියද?

මගේ ජීවිතේ ආදර්ශය වුණේ මගේ තාත්තා.

* ගෙවීගිය කාලය ගැන හිතෙන්නේ?

මම ඉතාම වාසනාවන්ත පුද්ගලයෙක් කියලා හිතෙනවා.

* ඔබට ලියනවා නම් කතා කරනවා නම්?

0772988227, 0718244641 අංකවලට කතා කරන්නත් mudithavidana@sjp.ac.lk ඊමේල් ලිපිනයට හා අධිකරණ වෛද්‍ය දෙපාර්තමේන්තුව, වෛද්‍ය විද්‍යා පීඨය, ශ්‍රී ජයවර්ධනපුර විශ්ව විද්‍යාලය, නුගේගොඩ ලිපිනයට ලියන්නත් පුළුවන්.

බියංකා නානායක්කාර | ඡායාරූපය- චතුර එස්. කොඩිකාර

Access the article : http://www.rivira.lk/online/2016/06/04/%E0%B6%B4%E0%B6%B1%E0%B7%8A%E0%B6%AD%E0%B7%92%E0%B6%BA%E0%B7%9A-%E0%B6%AF%E0%B7%99%E0%B7%80%E0%B7%90%E0%B6%B1%E0%B7%92%E0%B6%BA%E0%B7%8F%E0%B7%80%E0%B7%93%E0%B6%B8-%E0%B6%AF%E0%B6%BB%E0%B7%8F%E0%B6%9C/

 

Category Posts